Дундговь аймгийн Эрдэнэдалай сумын Соёлын төв нь анх 1946 онд улаан булан нэртэй Лувсанзандан эрхлэгчтэйгээр байгуулагдсанаас хойш өнөөдөр хүртэл 72 жил тасралтгүй урлаг соёлын үйл ажиллагааг явуулсаар ирсэн байна. 1974 онд одоогийн ашиглаж байгаа барилга ашиглалтад орж эрхлэгчээр нь Цэдэндамбаа гэдэг хүн ажиллаж байсан ба байгуулагдсан цагаас хойш Лувсанданзан, Раднаа, Намхайжанцан, Дамдинсүрэн, Сүхбаяр, О.Мядагмаа нар уг байгууллагын эрхлэгчээр ажиллаж байжээ.
Одоогийн соёлын төвийн барилга нь нэгдлийн 1000,0 гаруй төгрөгийн төсвөөр баригдаж 1974онд ашиглалтанд орсон. 250 хүний суудалтай үзэгчдийн танхим, бүжгийн заал, номын сан, хөгжмийн болон, жүжигчдийн өрөөтэй орчин үеийн хөгжим техник хэрэгсэлтэй , сумын иргэд, хүүхэд залуучуудад төрөл бүрийн уралдаан тэмцээн, шоу цэнгүүн явуулж, концерт тоглож, кино номоор үйлчилж, эрхлэгч, хөгжмийн багш бүжгийн багш, номын санч,техникч, үйлчлэгч, аж ахуй, галч зэрэг орон тоотой ажил үйлчилгээ явуулж байна.
Эрхлэгч Ө.Эрдэнэчимэг нь 2012 оноос ажиллаж байгаа ба номын санч - мэдээлэл, соёлын өвийн ажилтнаар Б.Оюунчимэг, хөгжмийн багшаар Б. Адъяацэнд, бүжгийн багшаар МУСТА Б.Шинэбаяр, техникч-няраваар М.Цэндмаа, үйлчлэгч-кассчинаар Н. Болормаа, гэрээт ажилтан О. Ганзориг, Б.Баярбаатар, Б.Мандах нар ажиллаж байна.
Жил бүр урлаг уран сайхан, соёл олон нийтийн 117-128 арга хэмжээ зохион байгуулагдаж, давхардсан тоогоор 20000-25000 хүнд үйлчилж, өөрийн үйл ажиллагаанаасаа 2.000.000-2.600.000 төгрөгний орлого оруулж байна.
Мөн үндэсний хөгжим, бүжиг, дуу, даралтат хөгжим, яруу найраг, хөтлөгчийн дугуйлангууд хичээлээж байна. Жил бүр дугуйлангийн төрөл, сурагчдын тоо нэмэгдэж байдаг.
Номын сан нь анх 1962 онд Т.Базарчүлтэм эрхлэгчтэй 170 гаруй номтой байгуулагдаж Номын санчаар Доосмаа, Ц. Мядагмаа. Ц. Пүрэв, Ө.Баярмаа нар ажиллаж байсан байна. Одоо 4765 гаруй мянган номын фондтой ажиллаж байна.
Манай байгууллага нь урлаг соёлын үйл ажиллагаанаас гадна өөрийн орон нутагт орших соёлын өв, ТСҮХДЗ-ийг судлах, бүртгэн баримтжуулах, хадгалалт хамгаалалтыг сайжруулах зэрэг үйл ажиллагааг хариуцан зохион байгуулж хийдэг ба Соёлын өвийн ажлыг номын сан – мэдээллийн ажилтан Б.Оюунчимэг хавсран хийж байна.
Соёлын төв нь МУ-ын Засгийн газрын хөтөлбөр, Аймаг, Сумын Засаг даргын үйл ажиллагааны хөтөлбөрүүдэд соёл урлагийн байгууллагын талаар дэвшүүлсэн зорилт, бусад хууль тогтоол, шийдвэрүүдийг хэрэгжүүлэх ажлын хүрээнд сумын нийт иргэд өсвөр залуу үеийнхэнд соёл урлагаар үйлчлэх үндэсний ёс заншлаа хамгаалах, дээдлэн хүндэтгэх өвлүүлэн эзэмшүүлэхэд ажлаа чиглүүлэн ажиллаж байна.
Соёлтой харьцаа эзэмшиж төлөвшсөн, мэргэжлээрээ мэргэшсэн чадвартай боловсон хүчнээр хангагдсан, соёл урлаг, мэдээ мэдээлэл, сургалт, чанартай үйлчилгээ, шаардлагатай техник тоног төхөөрөмжөөр хангагдсан, тохилог орчин бүхий СОЁЛ МЭДЭЭЛЛИЙН ТӨВ болоход оршино.
