Сайхан–Овоо сум 1923 оны усан гахай жил Богд хан уулын аймгийн (Дэлгэрхангай уулын хошууг задалж сумд болгох шийдвэр гарсны дагуу) хошууны баруун хойд зах нутагт сум байгуулахаар тогтож, нутгийн хашир хүмүүс хаана байгуулах тухай хэлэлцсэн гэдэг. Тэр үед нутгийн зарим өвгөд Цогт уулан дахь Онгийн хийд бараадуулан байгуулах, мөн Цогт уулын эртний тахилгат Сайхан-Овоо хайрханаар нэрлэх санал гаргажээ. Гэтэл хийдтэй хамт байж болохгүй, бартаа ихтэй тул алсдаа чийчаан хүрч чадахгүй, гээд газрын дунд байрлалтай, сайн устай хэмээн одоогийн “Найз” багийн нутаг Ширээ гэдэг газрыг сонгон анхны тулгын чулуугаа тулж, Сайхан–Овоо хэмээн нэрлэхээр болсон гэдэг.
Дарга, нарийн бичгийн дарга, зарлага гэсэн 3 орон тоотой, албан хэрэг явуулах 2 бор гэртэйгээр байгуулагджээ.
Сумын анхны даргаар Д.Палаандорж гэдэг хүн ажиллаж байв. Анхны Нарийн бичгийн даргаар нь З.Тулга, анхны зарлагаар М.Мижид нар ажиллаж байжээ.
Анхны дарга Д.Палаандоржийнх мал сайтай айл байсан тул, тэднийх хаана өвөлжөөлж, хаана бууна Сумын төв нь мөн л тэнд нь өвөлжөөлж, дагаж нүүдэллэн явсаар 1931 оны төмөр хонин жил одоогийн байгаа Онги голын зүүн эрэг Хадан хошууны энгэрийн тэгш дэнжийг сонгон төвхнөжээ.
Тэр тухай:
... Гурван тэмээ ачаатай нохой дагуулсан хүмүүс ирж манайхтай саахалт буудаллан гялтайсан цагаан гэр барьж байхыг нь сонирхон харж байж билээ. Тэр хүмүүс дөрвөлжин хайрцаг дуугаргаж байсан. дягтруул гэж нэрлэж байсан эгшигт хайрцаг бололтой Манайх хойд “Улаан эрэг”, Хадан хошуунаас холддоггүй айл байсан..., түүнээс дараахан ээжтэйгээ аргалд явж байтал нэг навтгар хар юм хажуугаар яваад өнгөрсөн, очиж мөрийг нь үзтэл хачин гоё хээтэй, 2 нарийн мөр үлдээсэн байсан, би тэр гоё мөрийг өдөр болгон очиж үздэг байж билээ... хэмээн сум анх буудалласан буюу анхны машин харсан тухайгаа эдүүгээ 88 насыг зооглоод буй БНМАУ-н аварга тууварчин Дарьмаагийн Содном гуай хуучилсан.
Тэр үед сумын даргаар Дооровын Жигмэд ажиллаж байжээ.
Сумын даргын албыг 1923-1928 оныг хүртэл Д.Палаандорж, 1928 оноос 1939 оны хооронд, Дооровын Жигмэд, Дорж З.Тулга 2 жил, Ц.Жамбадагва, Ёндон, Цээсүрэнгийн Самбадорж 3 жил нар, 1939-1941 онд Лхамжидын Дашдэлэг, 1941 оноос Жамбалын Дэмбэрэл занги нар тус тус хашиж байжээ. Жамбалын Дэмбэрэл нь урьд сумын занги байсан.
Зарим ном бичигт Сумын анхны даргыг Ишдорж Галдаа гэж бичсэн байдаг. Ишдорж нь Галдаа-манжийн үеийн жижиг хэргэм бололтой
Ишдорж Галдаа нь Дэлгэрхангай уулын хошууны тамгын газарын нарийн бичгийн даргаар ажиллаж байгаад “1932 оны үед зүүнтны нугалаа”-ны үеэр анхны хоршоотой зэрэгцэн Гэлэг бичээчийн хүү Цэвэлравжаагийн хамтаар “хамтрал, хомун коммун” гээчийг байгуулж, даргаар нь ажиллаж байсан, сумын дарга хийж байгаагүй хэмээн, Сумын анхны зарлагаар ажиллаж байсан Мижид болон тухайн үед амьдарч байсан учир мэдэх хөгшид ярьдаг байжээ.
1931 онд засаг захиргааны бүтцэд өөрчлөлт хийж, мөн оны 2 сарын 7 ны өдрийн БНМАУ-ын Улсын бага хурлын тэргүүлэгчдын хуралдааны 5-р тогтоолоор Сайхан-Овоо сумыг Өмнөговь Аймгийн сум болгон шийдвэрлэсэн.
Тус сум нь 1933 оны байдлаар 5 баг, 388 өрх, 1600 хүн ам, 39,1 мянган толгой малтай тухайн үедээ нэлээд томоохонд орох сумдын нэг байсан байна.
